Дні духоўнага аднаўлення «Карытас». Рэкалекцыяніст - кс. Аляксандр Яшэўскі SDB
- Катэгорыя: Навіны
1 сакавіка 2010 г. у Цэнтры імя св. Лукі ў Ляскоўцы распачаліся дні духоўнага аднаўлення для супрацоўнікаў дабрачыннага каталіцкага фонду «Карытас» з усіх дыяцэзій Беларусі. Трохдзённыя рэкалекцыі распачаліся святой Імшой, якую ўзначаліў дапаможны біскуп Мінска-Магілёўскай архідыяцэзіі Антоні Дзям’янка, старшыня Рады па справах Дабрачыннасці, Міру і Справядлівасці.
Гамілію падчас літургіі прамовіў рэкалекцыяніст кс. Аляксандр Яшэўскі SDB, дырэктар Катэхетычнага аддзела Мінска-Магілёўскай архідыяцэзіі. Напачатку святар растлумачыў прысутным, дзеля чаго неабходны велікапосныя рэкалекцыі, а ў дадзеным кантэксце, рэкалекцыі для супрацоўнікаў дабрачыннай арганізацыі. Найперш, як падкрэсліў рэкалекцыяніст, гэта неабходна для таго, каб «аднавіць сваю матывацыю»: дзеля каго, у імя Каго і з Кім мы працуем. Як святарам, так і свецкім асобам, па словах кс. Аляксандра Яшэўскага, неабходна яшчэ раз падумаць аб тым, наколькі важнаю з’яўляецца праца ў сферы дабрачыннай дзейнасці, якую здзяйсняе Касцёл праз іх пасрэдніцтва. Робячы штосьці ў імя Езуса Хрыста і дзеля Яго хвалы, важна не забываць пра духоўнае жыццё, каб, як адзначыў рэкалекцыяніст, гэта высакародная справа сапраўды рэалізоўвалася дзеля Езуса і разам з Ім.
Па словах кс. Аляксандра Яшэўскага, у духоўным жыцці самым істотным і святым з’яўляецца дар святой Камуніі, дар прысутнасці Езуса ў святых дарах. Святар заклікаў удзельнікаў рэкалекцый задумацца, ці імкнёмся мы жыць святой Эўхарыстыяй, як гэта чынілі нашы сучаснікі Слуга Божы Ян Павел ІІ і святая Маці Тэрэза з Калькуты.
У наступныя два дні ўдзельнікі рэкалекцый будуць разважаць на тэму сакрамэнту пакаяння — адной з асноўных складальнікаў Вялікага посту, а таксама пра апошні суд, калі кожны павінен будзе здаць «справаздачу» са свайго жыцця.
