Адрас:вул. Пляханава, 28 к1,
 Мінск, Рэспубліка Беларусь
☎капл+375 17 3679386
☎канц +375 17 3683856
E-mail: serebranka@sdb.by

 

 
 

 

 

 

Першая Кантакт Для друку
Belarusian English Italian Polish Russian
Банэр
Банэр
Банэр
Банэр
Беларускае Вальдокка — Салезіянская сям’я Беларусі сустрэлася ў Мінску на ўрачыстае святкаванне успаміну св. Яна Боско
Навіны
01.02.2016
Успамін св. Яна Боско урачыста святкуе 31 студзеня Салезіянская сям’я ва ўсім свеце. Мінск на адзін дзень стаў падобны да таго Вальдокка ў Турыне, адкуль салезіянская харызма распаўсюдзілася па ўсім свеце. Бо менавіта ў Мінску ў гэты дзень прадстаўнікі ўсіх галін Салезіянскай сям’і Беларусі, моладзь і госці — усіх каля 500 чалавек — сабраліся на ўрачыстае святкаванне дня нараджэння для неба свайго заснавальніка. Святую Імшу ўзначаліў часовы павераны ў справах Апостальскай Нунцыятуры мансеньёр Марынко Анталовіч. 
 
 
 
Асаблівымі пунктамі ўрачыстасці сталі: падзяка за пражыты Юбілейны год святкавання 200-годдзя з Дня нараджэння св. Яна Боско і прэзентацыя Дэвізу на 2016 год. Таксама ўсе прысутныя сталі сведкамі гістарычнай падзеі развіцця Салезіянскай Сям’і на Беларусі: было асвечана і ўручана салезіянам першае выданне Канстытуцыі Таварыства Святога Францішка Сальскага на беларускай мове. Кранальным падчас св. Імшы для Салезіянскай сям’і быў і момант, калі ксяндзы салезіяне і салезіяне супрацоўнікі аднаўлялі свае абяцанні вернасці Богу і харызме святога Яна Боско, кожны адпаведна свайму стану. 
 
 


Адказны за салезіянаў на Беларусі кс. Віктар Гайдукевіч SDB прывітаў ўсіх прысутных на ўрачыстасці, падкрэсліваючы важнасць кожнага сабрата, кожнай сястры салезіянкі і салезіяніна супрацоўніка. Асаблівым чынам словы прывітання святар скіраваў да моладзі, служэнню якой паклікана ўся Салезіянская сям’я. Ксёндз Віктар пажадаў скарыстацца з магчымасці падзякаваць Богу за дар святога Яна Боско і плённа перажыць гэту святую Эўхарыстыю.  «Мы моцная і дружная сям’я. І я спадзяюся, што праз гэтую ўрачыстасць мы не толькі адновім нашую салезіянскую духоўнасць, але зачэрпнем неабходную творчую сілу для далейшай душпастырска-выхаваўчай працы ў стылю кс. Боско», — дадаў Рэгіянальны настаяцель.

 

Святы Ян Боско быў вельмі адданы і паслухмяны Святому Айцу. Салезіяне наследуюць свайго заснавальніка ў гэтым. Таму вялікім гонарам была прысутнасць на свяце прадстаўніка Апостальскай Сталіцы часовага паверанага ў справах Апостальскай Нунцыятуры мансеньёра Марынко Анталовіча. Ерарх падзяліўся з сабрынымі тым, што ён вельмі рады раздзяліць гэтую ўрачыстасць з Салезіянскай сям’ёй. Святар падкрэсліў, што такія сустрэчы з’яўляюцца нібы лекам для святара-дыпламата, які большую частку свайго часу працуе з дакументамі. У гаміліі мансеньёр Марынко прыгадаў, што св. Ян Боско спрачаўся з Богам, пытаючыся ў Яго, чаму Ён нічога не робіць, каб дапамагчы патрабуючым, асабліва беднай моладзі. І на гэта Святы атрымаў адказ ад Бога: «Я ўжо зрабіў, Я стварыў цябе!» «Дарагая моладзь, дарагія дзеці, многія з вас маюць той самы узрост, як ксёндз Боско ці прарок Ерамія, у якім Бог звярнуўся да іх. Таксама і вас Бог любіць гарачай любоў, як любіў прарока Ерамію і ксяндза Боско. І таксама для кожнага з вас Бог мае свой план.  Слухайце, маліцеся, прасіце Пана і дазвольце, каб Ён кіраваў вамі», — звярнуўся святар да малодшага пакалення. Працягваючы разважанні, прадстаўнік Апостальскай Нунцыятуры падкрэсліў, што кожны можа стаць падтрымкай і праяўленнем любові і клопату Бога для бліжняга. Вельмі важна зрабіць тое, што кажа Пан, не апраўдваючыся занадта маладым узростам, няўменнем прамаўляць, як гэта было з прарокам Іераміяй, альбо недахопам часу ці стомленасцю. Трэба ўстаць і пачаць рабіць тое, што кажа Бог.  Мансеньёр Марынко падкрэсліў, што і сёння свет патрабуе такіх постацяў, як ксёндз Боско і прарок Іерамія, якія б сталі голасам Бога і мастом паміж Богам і чалавецтвам. Таксама святар заклікаў не палохацца выпрабаванняў і цяжкасцяў, якія так часта сустракае чалавек, але якія былі таксама і на шляху Езуса, Марыі і шматлікіх святых. Ён заахвоціў заставацца вернымі хрысціянамі, засяродзіць увагу на магчымасцях даць сведчанне нашай веры і любові, радавацца перад абліччам выпрабаванняў, якія дазваляюць даваць гэтае сведчанне. А на прыканцы гаміліі мансеньёр Марынко пажадаў усім святасці і паўтарыў словы апостала Паўла: «Радуйцеся заўсёды ў Пану».

 

Працяг святкавання адбыўся ў араторыі. Там салезіянская моладзь падрыхтавала праграму, якая працягвала разважанні на тэму радасці, як шляху да святасці і адметнасці салезіянскай харызмы. Мэтай падрыхтаваных танцаў, тэатральных пастановак, спеваў і гульняў было паказаць, што радасць існуе, нягледзячы на штодзённыя клопаты, і да яе трэба імкнуцца; падкрэсліць каштоўнасць сям’і; расказаць, што харызма ксяндза Боско жыве і развіваецца. Таксама маладыя разважалі над Дэвізам Салезіянскай сям’і на 2016 год. Вядучыя — малады хлопец Максім, які сустрэў ў сваім жыцці салезіян, і дзяўчына-робат Дзіяна — былі «гідамі» па гэтай праграме. Каб выканаць пастаўленую мэту, яны паклікалі на дапамогу шмат іншых людзей з адкрытымі сэрцамі, гатовымі дзяліцца сваім досведам і ўменнем радавацца ў Пану.

І канечне прысутныя назіралі за момантам уручэння медалёў пераможцам і лепшым гульцам пятага юбілейнага турніру па мікра-футболе «Кубак Дона Боско». 

Варта адзначыць, што Салезіянская сям’я прыклала шмат намаганняў, каб урачыстае святкаванне ўспаміну святога Яна Боска прайшло ў лучнасці з Генеральным Настаяцелем ксяндзом Анхэлем Фярнандэсам Арцімэ SDB і  салезіянскімі пляцоўкамі ва ўсім свеце. Таму, акрамя Дэвізу,  да свята былі перакладзены на беларускую мову відэазварот з віншаваннямі кс. Анхэля і  «Пасланне Генеральнага Настаяцеля да моладзі з усіх салезіянскіх пляцовак у свеце з нагоды ўрачыстасці святога ксяндза Боско»якое прачытаў кс. Павел Шчарбіцкі SDB напрыканцы праграмы.  
 
 

Закончылася свята благаслаўленнем, якое ўдзяліў прысутным мансеньёр Марынко, смачным пасілкам і цёплымі размовамі сабраўшыхся разам з нагоды ўрачыстасці св. Яна Боско прыхільнікаў салезіянскай харызмы.
 

 

Салезіянка супрацоўніца Ірына Петрусевіч
Матэрыял сайта sdb.by

 

 
© 2006-2013 Рымска-каталіцкая парафія Св. Яна Хрысціцеля ў г. Мінску
Банэр

Rating All.BY Каталог TUT.BY Rambler's Top100